Улам халуухан болсон дуучин Адель шинэхэн найз залуутайгаа папарацийн дуранд өртжээ

Илүүдэл жингээсээ огтхон ч санаа зовдоггүй, хүмүүсийн нүдэнд зориулж бус чихэнд зориулж уран бүтээлээ туурвидаг гэгддэг байсан дуучин Адель сүүлийн хэдэн жилд огцом жин хаяж, огт өөр дүр төрхөөр эргэн ирсэн нь дэлхий нийтийн анхаарлыг татсан билээ. Өдөр ирэх тусам улам эрхэмсэг дэгжин болж буй дуучин бүсгүй маань саяхан халуухан бие галбир, шинэ найз залуугаараа гайхуулсан байна.

Өдгөө 33 настай Адель олны нүднээс далд байх хугацаандаа 45 кг хасаад эргэн ирсэн явдлыг шүтэн бишрэгчид нь 8 жил хамт байсан нөхрөөсөө салж, сэтгэл гутралд орсноос болов уу хэмээн санаа зовниж байлаа. Гэхдээ дуучин бүсгүйн хувийн амьдрал өдгөө тун аз жаргалтай байгааг үерхээд хэдэн сар болж буй найз залуу Rich Paul-тайгаа хамт өнгөрүүлсэн мөчүүдээс нь харж болно.

Галбир тодотгосон бариу хар цамц, шоо хээтэй мини банзал, урт түрийтэй гутлаар гоёсон Адель өнгөрсөн даваа гарагийн үдэш Лос-Анжелесийн чинээлэг хороололд найз залуутайгаа оройн зоог барьж, романтик болзоонд явж байхыг энтертаймент сэтгүүлчид олж харжээ.

Энэ онд албан ёсоор үерхэж эхэлсэн хос хоёрын харилцаа улам батжиж, дотно болсон байгааг биеийн хэлэмж, үйл хөдлөл судлах тал дээр мэргэшсэн хүмүүс онцолж байлаа.

Түүний найз залуу, 39 настай Рич Пол нь спортын арын албаны нэр хүндтэй мэргэжилтэн бөгөөд Леброн Жэймсийн агент буюу хувийн төлөөлөгч гэдгээрээ Америкт танигджээ.

Тиймдээ ч Адель, Рич нар NBA-ийн финалын тоглолтыг хамтдаа үзэж, амрагийн холбоотой болсон гэдгээ олон нийтэд мэдэгдэж байсан билээ.

Дуучин бүсгүйн жин ихээр хассан нууц нь 90% хоолны дэглэм, 10% дасгал хөдөлгөөн байсныг хувийн дасгалжуулагч нь дэлгэсэн юм. Адель долоо хоногт гурван удаа өөртөө тохирсон дасгал хийдэг бөгөөд хэзээ ч бэлтгэлээ тасалж байгаагүй. Мөн тэрбээр тэжээллэг чанар ихтэй загас, кофе, гүзээлзгэнэ, турмерик, сонгино зэргийг түлхүү хэрэглэдэг Сиртфудын дэглэмийг барьж жингээ амжилттай хассан ажээ.

Мөн олон жил ханилж, үрийн зулай үнэрлүүлсэн анхны нөхөр Саймон Конеки нь түүнийг орхисон явдал дуучин бүсгүйг улам хүчирхэг болгож, удаан хөдөлмөрлөх нэг шалтгаан болсон нь тодорхой. Өнгөрсөн онд Адель инстаграмдаа зургаа нийтлэхдээ тайлбар хэсэгт нь ”Би өмнө уйлдаг байсан, харин одоо хөлөрдөг болсон” гэж бичиж байв.

Source: caak.mn

Санал болгох

Leave a Reply

Your email address will not be published. Required fields are marked *

Back to top button